مروان بابلو
مروان بابلو
مين هو وايه الصجة اللى علية دى ....
شوف الصورة دي من شوية طالعة في ميمورز اليوم السابع بسبب كومنت عليها لحد من الفريندس عندي.. مروان بابلو اللي طالع تريند من إمبارح بسبب أغنية جديدة ليه كان زي النهاردة السنة اللي فاتت بيقول إنه تاب عن الغنا لأنه حرام! تلقائياً لقيتني بيدور في ذهني مشهد الحاج دهشوري مع ابنه خلف في فيلم صعيدي في الجامعة الأمريكية وهو بيحكيله عن الراجل اللي اشترى أرض ووهبها لربنا إنه يبنيها جامع وبعد عمر طويل الأرض إتبنت ماخور(خمارة) لما اتباعت لخواجه بعد مالورثة اتعذروا في قرشين! صوته وهو بيقول لإبنه شوف ياخلف الأرض ابتدت بإيه وإنتهت لإيه بيقشعرلي جسمي في كل مرة أتفرج عليه! أنا حرفياً شوفت بعيني واحد كانوا بيصلي بالناس جماعة في المسجد دلوقتي ماشي في طريق المخدرات للأسف مع إن محدش فينا كان يتخيل إنه يشرب حتى مجرد سجارة! شوفت بعيني ناس عل السوشيال ميديا الواحد كان بيحسدهم والله ع إيمانهم دلوقتي مبقوش مؤمنين إن فيه إله أصلاً! شوفت ناس كتير حالهم اتبدل 180 درجة في يوم وليلة كدا بدون أي إشارة أو سابق انذار! إحنا ضغاف حرفياً بجد، أضعف بكتير من إننا نملك في نفسنا أي شيء،منضمنش بكرة مخبيلنا إيه ولا مصيرنا لإيه في النهاية! سيدنا عمر بن الخطاب اللي مفروض ربنا مبشره بالجنة كان بيقول والله لو وضعت قدم في الجنة وقدم خارجها لما آمنت مكر الله.. فما بالكم بينا إحنا!
"رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِن لَّدُنكَ رَحْمَةً ۚ إِنَّكَ أَنتَ الْوَهَّابُ "
تعليقات
إرسال تعليق